DEMPUÉS DE SIETE AÑOS DE TRABAYU DE COMPILACIÓN
La Xunta Xeneral va reconocer oficialmente’l Derechu Tradicional Asturianu
Redacción
13/03/2007 Dempués de siete años d’un trabayu qu’entamó allá pel añu 1999, la Xunta Xeneral del Principáu d’Asturies tien yá rematáu’l llabor de compilación del Derechu Consuetudinariu Asturianu. El dictamen de la comisión especial pa facer estoyu de tol cuerpu de lleis y vezos tradicionales del país va llevase al plenu de la Xunta Xeneral esti mesmu xueves, siendo’l primer puntu a tratar nel orde del día.
La comisión especial encargada d’esti trabayu contó a lo llargo d’estos años cola collaboración d’un grupu de profesionales de la Universidá y de lletraos de la Xunta Xeneral. La investigación qu’agora va facese oficial nel parlamentu asturianu, dempués del análisis de más de 40.000 sentencies xudiciales dende l’añu 1930 hasta’l presente, más protocolos notariales y trabayu de campu, espeya un total de 26 figures xurídiques tradicionales qu’acrediten la existencia d’un Derechu Consuetudinariu Asturianu, un corpus llegal asemeyáu al derechu foral de comunidaes como’l País Vascu. L’Estatutu d’Autonomía d’Asturies, nel so artículu 16 obliga a conservar y compilar esti derechu, elevando’l vezu a rangu de llei.
Les 26 figures llegales del del Derechu Consuetudinariu Asturianu traten aspectos como l’usu del agua pal riegu, vezos de trabayu comunitariu como l’andecha o la sestaferia, d’arriendu y aparcería de tierres, aspectos rellacionaos cola pesca, la venta de ganáu, l’empeñu, servidumes de pasu, derechu sobre horros y paneres, llinderos de faces y praos, derechu de prinda y otres figures.