Esbarrumble de la panerona de Sietes
Artículo puesto en línea el 8 de agosto de 2008
última modificación el 5 de agosto de 2021

por Prenseru

06/08/2008 http://www.asturies.com/noticia.php...

CONXUNTU ETNOGRÁFICU DE VILLAVICIOSA

El Garrapiellu denuncia l’esbarrumble de la panerona de Sietes

Redacción

La Tertulia Cultural "El Garrapiellu" emitió ayeri un comunicau en que denuncia l’esfarraple de la Panerona de Sietes, en Villaviciosa, elementu etnográficu del sieglu XVIII del que yá denunciare delles vegaes el so mal estáu y abandonu xunto col de los demás horros de la parroquia. L’asociación cultural afirma que ye "de les que más trabayaron y puxaron pola conservación del conxuntu etnográficu de Sietes" y llamenta que "Desesperamos al ver el resultáu". El Garrapiellu, que llevó nel so día a distintes autoridaes a conocer los horros de Sietes sobre’l terrén, denunció "la desastrosa iguadura de los horros a la que siguió l’abandonu". Pal Garrapiellu "esti desastre rebasa tolo maxinable" y acusa a la Conseyería de tar "na inopia, nel "parque temáticu", nel Paraísu Tarrenal".

El Garrapiellu llamenta especialmente lo inutil de la intervención que se fexo nos horros "La "rehabilitación" diéronla a la baxa, p’aforrar perres" asegura el Garrapiellu. "Ficieron una intervención vergoñosa, de xulgáu de guardia, nun teníen idega de les partes d’un horru" afirma la Tertulia Cultual, que ta segura de que "Sietes yera pa estes empreses una tarta llambiona pa facer chapuces y cobrar". La Tertulia llama l’atención sobre’l papel de la Conseyería de Cultura, que diz que se dedica "a facer informes y a dar subvenciones al tun tun, non a protexer nada".

"El Garrapiellu" acaba faciendo un llamau a les asociaciones esmolecíes pol patrimoniu, a l’asociación Horru.com, a los espertos del Pueblu d’Asturies, a les persones sensibles del país, etnógrafos, fotógrafos, pintores, arquiteutos, a les asociaciones culturales, a los vecinos de Sietes y Villaviciosa, y a la sociedá civil asturiana, a facer un conceyu abiertu en Sietes, pa presentar una denuncia ante quién correspuenda. "El Garrapiellu" denuncia l’abandonu y mala xestión d’esti patrimoniu señeru d’Asturies.


06/08/2008 http://www.asturnews.com/index2008....

“El Garrapiellu” denuncia l’esbarrumbe de la panerona de Sietes pol abandonu del Gobiernu d’Asturies

Redacción

Imaxe de la panerona cayida

La Tertulia Cultural “El Garrapiellu”, una de les asociaciones culturales que más trabayaron y puxaron pola conservación del conxuntu etnográficu de Sietes, en Villaviciosa, dio anuncia al traviés de nota de prensa de la so denuncia pola cayida de la panerona del perconoíu conxuntu d’horros y paneres maliayos. L’asociación recuerda “cuantayá que denunciamos que los horros y paneres taben cayendo”.

“El Garrapiellu” recuerda les acciones entamaes dende la so organización pa evitar esti “desastre que rebasa tolo maxinable”. Acciones que fueron dende consiguir les visites de conceyales y del Direutor de Cultura anterior, hasta la reinvidicación pública y la visita a los vecinos de la zona.

Dende la tertulia xixonesa dicen falar “dende la indignación, sintiendo nel alma l’esbarrumbe la Panerona de Sietes, un exemplar datáu -polo menos- nel sieglu XVIII” y dempués de comprobar in situ el fechu. Y énte esta situación entrúguense “¿Como ye posible esta desidia?... ¿Nun vieron qu’había nevaes, que cayeron bastiazos d’agua, qu’argayaben tierres, que los horros y paneres peligraben?... Porque yá avisa’l refraneru: ‘Si en febreru oyes tronar, yá puedes encontar la panera y el payar’ ”.

Pa El Garrapiellu “la Conseyería paez que ta na inopia, nel “parque temáticu”, nel Paraísu Tarrenal. Tán a veles pasar. A cuntar perdes irreparables, mientres falen de planes que nun vemos los mortales. A facer informes, a protexer nada, a dar subvenciones al tun tun, a la xestión de cobros a los paisanos, poniéndo-yos toles torgues del mundu cuando van a pidir permisu pa iguar un teyáu o poné-y un encontu a una trabe que ta fundiendo”.

Agora, comenten dende l’asociación “muertu’l burru, la cebada al ráu, van facer “ortofotografíes” de los horros del conceyu Villaviciosa. Quedarán perguapos nel mundu virtual. Podemos tar tranquilos”, ironicen.

Tamién quixeron recordar les promeses incumplíes del Gobiernu d’Asturies: “¿En qué quedó lo de facer del Pueblu d’Asturies cabecera d’una rede museos y conxuntos singulares del patrimoniu etnográficu, nel que’l pueblu de Sietes, colos horros y paneres del “estilu Villaviciosa”, diba tener un llugar especial?... ¿Qué van poner nel Aula d’Interpretación del Casinu recién remocicáu, pal que’l Garrapiellu pide’l nome del gran etnógrafu de la comarca y collaciu nuestru, Rafa Balbín?... ¿Van facer xestión cultural, de qué patrimoniu etnográficu?”.

Dende El Garrapiellu piden que se reconstruya la obra y s’igüe la situación de Sietes, que pa EG ye “un símbolu de la situación cultural d’Asturies. Namái les perres que se gasten n’una fartura en La Llaboral, Ciudá de la Cultura, valíen p’haber remocicao con tol procuru, por mayestros carpinteros horreros que conocen les téuniques tradicionales, esta panera del XVIII, y otros tres horros más. Con materiales y madera noble, calteniendo dellos elementos cola so talla orixinal. Y pa facer un llibru de téuniques y procesos de remocicamientu que sirviera d’exemplu a los particulares. ¿Ú ta’l serviciu de restauración de l’arquitectura popular d’Asturies?”.

“El Garrapiellu” quier allevantar la voz, y protestar con toles sos fuercies. Llama a les asociaciones esmolecíes pol patrimoniu, a l’asociación Horru.com, a los espertos del Pueblu d’Asturies, a les persones sensibles del país, etnógrafos, fotógrafos, pintores, arquiteutos, a les asociaciones culturales, a los vecinos de Sietes y Villaviciosa, y a la sociedá civil asturiana, a facer un conceyu abiertu en Sietes, pa presentar una denuncia ante quién correspuenda. “El Garrapiellu” denuncia l’abandonu y mala xestión d’esti patrimoniu señeru d’Asturies.