Venta On-line: http://www.trabe.org/llibru.asp?id=1184

Comentariu editorial: Esta Guía de los árboles d`Asturies, la más completa publicada hasta agora, recueye 95 especies d’árboles que se puen atopar pelos montes asturianos, con información detallada de cada planta, tanto no tocante a la botánica como a aspectos culturales o llingüísticos. Asina, de cada especie ofrezse’l nome científicu, la familia a la que pertenez, la denominación n’asturianu y gallegoasturianu más comunes y otros sinónimos, amás del nome en castellanu, portugués, francés, alemán y inglés. Tamién se da la so etimoloxía, la descripción de les sos característiques y del hábitat onde miedra, los sos usos tradicionales y aplicaciones, la toponimia asturiana rellacionada col so nome y, nun apéndiz, otros datos d’interés, como les posibles variedaes del frutu. Indícase, igualmente, si se trata d’una especie melicinal o comestible, si ta protexida o si ye tóxica.

Con cásique 500 fotografíes a color, dibuxos de los tipos de fueyes, frutos, inflorescencies y conos, la obra complétase con una breve y útil introducción a la botánica y con dos amplios glosarios, unu botánicu y otru melicinal. Por último, l’índiz de nomes vulgares recueye más de 1.100 términos en llingua asturiana.

Los autores, Bertu Ordiales y Guillermo César Ruiz, que yá publicaron en 2002 la magnífica 21 rutes de senderismu per Asturies, ofrecen agora una obra de referencia, na que combinen rigor científicu y amenidá, y que va satisfacer a los amantes de la naturaleza y de la cultura asturianes.